LGU Irosin makikitabangan sa Jollibee Foundation nan DepEd

Katakod sa programa san Gobyerno Lokal san Irosin sa Nutrisyon, binagat ni Meyor Pidoy Cielo an representante san Department of Education na si Armando Almodiel. Siya an Focal Person para sa School-based Feeding Program san DepEd. Nangyari an nasabi na okasyon san ika-20 san Nobyembre 2019 sa Mayor’s Conference Room.

Si Mr Almodiel nag-representar man san Jollibee Group Foundation nan nagpaliwanag san “Busog, Lusog, Talino” JGF Support to DepEd and LGU Feeding Program. Obheto san nasabi na pagtiripon mao an pagpatindog Centralized Kitchen para sa feeding program san JGF kadanon an DepEd nan Gobyerno Lokal.

Presente man sa nasabi na tiripon sira Municipal Nutrition Action Officer Emelyn Vidar, Municipal Engineer Ben Gabionza, CM Lustre nan Municipal Administrator Inso Ubalde.
Base kan Meyor Pidoy, boot san Gobyerno Lokal san Irosin na makapahimo 2 na Centralized Kitchen para sa Feeding Program san bongto. Nakaplano na unahon an sa may Monbon Elementary School nan mao isusunod an sa may Irosin Central School.

#PARASAIROSIN
Para sa Irosanon!




MLGOO Julius Bonete, bag-o na DILG Officer san Irosin

Nagbisita sa opisina ni Meyor Pidoy Cielo para mag-courtesy call san ika-19 san Nobyembre 2019 si Municipal Local Government Local Operations Officer Julius P. Bonete. Siya an bag-o na tawo san Department of the Interior and Local Government na nadesignar sa Irosin.
Maaaraman na an dati na MLGOO Felix Cal-Ortiz maretiro na man sa DILG. Masasabi na si MLGOO Cal-Ortiz sayo sa pinaka-responsable sa pagkakakuha san Irosin san Seal of Good Local Governance.
Sa istoryahan ni Meyor Pidoy nan MLGOO Bonete, kaupod an pira sa mga department heads san munispyo, sinabi ni Meyor Pidoy na gusto niya na an Gobyerno Lokal san Irosin masustener taun-taon an rekognisyon bilang bongto na may Seal of Good Local Governance.
#PARASAIROSIN
Para sa Irosanon!




Meyor Pidoy padagos sa pagreparo san mga eskwelahan sa Irosin

San ika-19 san Nobyembre 2019 personal na binisita ni Meyor Pidoy Cielo an Mapaso Elementary School para reparuhon an kamutangan san mga edipisyo, mga estudyante nan mga maestra nan mga maestra didi.
Nagkabaragat mismo ni Meyor Pidoy an mga namagtukdo sa nasabi na eskwelahan na pinapamunuan ni Head Teacher Eleanor Huab.
Sinunod man ni Meyor Pidoy pagbisitaha an Tabon-Tabon Elementary School na pinapamunuan man ni Principal Maria Ines Galon. Naki-saro sa aktibidad san nasabi na eskwelahan an mga estudyante na namagpartisipar sa ingagahoy nira na Reading Camp 2019.
Nakiistorya man ni Meyor Pidoy si Principal Jacqueline Hipos sa kasunod hamok na binisita niya na Santo Domingo Elementary School kon diin direkta na inaram niya an sitwasyon didi.
An aktibidad parte sin mga pagpaplano san tama nan talagang kinakaipuhan na mga asistensiya na pwede ika-duhal san Gobyerno Lokal san Irosin para sa mga eskwelahan. Parte man ini san mandato nan obligasyon ni Meyor Pidoy bilang Chairman san Local School Board.
#PARASAIROSIN
Para sa Irosanon!




Nagkapira na mga eskwelahan binisita ni Meyor Pidoy.

Nagkapira na mga eskwelahan binisita ni Meyor Pidoy.
Parte san obligasyon bilang chairman san Local School Board personal na binisita ni Meyor an Gabao Elementary School, Gulang-Gulang Elementary School nan Irosin Central School san ika-18 san Nobyembre 2019.
Binagat an mga principal san mga nasabi na eskwelahan na sira Ms. Cristina G. Dedase Principal san Gabao Elementary School, Mr. Eddie P. Gestiada Principal san Gulang-Gulang Elementary School nan Mr. Manuel V. Estera Principal san Irosin Central School.
Kinumusta nan inreparo an kamutangan san mga nasabi na eskwelahan.
#ParasaIrosin
Para sa Irosanon!




Symposium on Teenage Pregnancy hinimo sa Irosin

Kinonduser an sayo na Symposium on Teenage Pregnancy san ika-15 san Nobyembre 2019 sa Irosin. Hinimo ini sa Lingap para sa Kalusugan ng Sambayanan – Resource Institute for Development and Grassroots Empowerment o LIKAS-RIDGE.
 
Pinangunahan an nasabi na tiripon nira Municipal Social Welfare and Development Officer Oliver Gabriel Franche nan Municipal Health Officer Dr. Nerissa Tagum.
 
An Symposium on Teenage Pregnancy hinimo para matagan tama na kaaraman an mga kabataan lalo na sa Irosin manongod sa mga sensitibo na bagay pareho sin pagburod sa diri pa tama na edad o teenage pregnancy. Kaopod man sa mga impormasyon nan katukduan na inhahatag mao an Adolescent Reproductive Health nan mga posible na hapdos na nakukuha sa pakiki-talik pareho san Human Immunodeficiency Virus (HIV) na nagiging resulta sin pagkakamay-on sin Acquired Immunodeficiency Syndrome (AIDS).
 
Maaaraman na halangkaw na man an kaso sin actual rate san teenage pregnancy sa Irosin kon kaya aktibo na naghihiwag lalo na an MSWDO nan MHO san bongto para matagan ini magkakanigo nan tama na aksiyon.
An nasabi na Symposium inatenderan san mga estudyante sa Veritas College nan Gallanosa National High School.
 
#PARASAIROSIN
Para sa Irosanon!